Friday, July 26, 2013

ကိုယ့်အချစ်ဆုံးနှစ်ယောက်....



ဒီကမ္ဘာမှာ ကိုယ်ချစ်ရတဲ့ အချစ်ဆုံးနှစ်ယောက်ရှိတယ်။ ကိုယ်သူတို့အပေါ် သိပ်ချစ်သလို သူတို့နှစ်ယောက်ရဲ့ ကိုယ့်အပေါ်ချစ်တဲ့အချစ်တွေက တူညီကြပေမဲ့ တစ်ခါတရံမှာ သူတို့က ရန်သူတွေလိုဖြစ်နေတတ်ကြတယ်။ ကိုယ်က ငယ်ငယ်ကလေးကတည်းက သူတို့ကြားက ငြိမ်းချမ်းရေးသံတမန်ဖြစ်ခဲ့တယ်။ ဒီကမ္ဘာမှာ ယောက်ခမနဲ့ ချွေးမဆိုတာ မသင့်မမြတ်နဲ့ ရန်သူတွေဖြစ်ဖို့များ ဖြစ်တည်လာခဲ့သလားဆိုတာ ကိုယ်အတွေ့အကြုံအရ လက်ခံချင်သလိုပဲ။ကိုယ်ချစ်တဲ့ ကိုယ့်အဖွားနဲ့ ကိုယ့်ရဲ့အမေကတော့ အဲဒီလိုဖြစ်နေခဲ့တာက ကိုယ်တွေ့ပါပဲ။
တစ်ဦးတည်းသောသားတစ်ယောက်ရဲ့ မိခင်မာနနဲ့ တစ်ဦးတည်းသောသမီးတစ်ယောက်ရဲ့ ဆက်ဆက်ကျဲ မဟုတ်မခံ မိန်းမနှစ်ယောက်ထိပ်တိုက်တွေ့ကြတဲ့အခါ….။
သူသိပ်ချစ်တဲ့ သားကမွေးလာတဲ့ မြေးကို သိပ်ချစ်တဲ့အဖွားပေမဲ့ ချွေးမကို မကြည်ဖြူနိုင်တဲ့ ကိုယ့်အဖွားနဲ့ ကိုယ့်မိခင်ရဲ့ မကျေနပ်မှု၊ မုန်းတီးမှုတွေကြား ကိုယ်က ရှင်သန်ခဲ့တယ်။
ဒါ့ကြောင့်ဖြစ်မယ်…. ကိုယ်က ငယ်ငယ်ကတည်းက သူတစ်ပါးမျက်နှာရိပ်မျက်နှာကဲ ကြည့်တတ်ခဲ့တယ်။ မေမေ့ရဲ့ ၀မ်းနည်းမှုက ကိုယ့်ရဲ့ ၀မ်းနည်းမှု။ မေမေငိုရင် ကိုယ်လည်းငိုတယ်။ မေမေမုန်းတဲ့ အဖွားကို ကိုယ်မမုန်းနိုင်ခဲ့တာတော့… ကိုယ့်နဲ့ ကိုယ့်အဖွားရဲ့ သံယောဇဉ်ပဲဖြစ်မယ်။
အဖွားရဲ့ သားအပေါ်သိပ်ချစ်တဲ့ မေတ္တာစိတ်က မေမေ့အပေါ်ဝန်တိုစိတ်ဖြစ်စေခဲ့သလားဆိုတာတော့ ကိုယ်ငယ်ငယ်က မတွေးတတ်ခဲ့ဘူး။ ကိုယ့်ရဲ့အဖေကော သူတို့နှစ်ယောက်ကြားမှာ ဘယ်လောက် အနေခက်ရမလဲဆိုတာ ကိုယ်အရွယ်ရောက်မှ တွေးမိခဲ့တယ်။
အစားကောင်းကောင်းစားရရင် ကိုယ်ချစ်တဲ့သူ၊ ခင်တဲ့သူတွေကို ကျွေးချင်တယ်တဲ့။ ကိုယ်ငယ်ငယ်ကတော့ အဲဒီသဒ္ဒါစိတ်ကို မသိခဲ့ဘူး။ ဒါပေမဲ့ အဖွားက ကိုယ့်ကို အစားကောင်းကောင်း တစ်ခုကျွေးရင် ကိုယ်မစားဘဲ မေမေ့ဆီယူလာပြီး မေမေ့ကို ကျွေးတတ်တယ်။ ဒီလိုပဲ မေမေက ကိုယ့်ကို အစားတစ်ခုကျွေးရင် အဖွားဆီယူလာပြီး အဖွားကို ကျွေးတတ်တာ အခုထိ အမှတ်တရရှိနေတုန်းပဲ။
မေမေက အဖွားအကြောင်း မကောင်းတာပြောရင် ကိုယ်နားမထောင်ချင်ဘူး။ ဒီလိုပဲ အဖွားက အမေ့အကြောင့် မကောင်းတာပြောရင် ကိုယ်အရမ်းစိတ်ဆင်းရဲရတယ်။ သူတို့ကြားက မကျေနပ်မှုတွေ၊ ၀န်တိုမှုတွေ၊ မုန်းတီးမှုတွေကို တဖြည်းဖြည်းလျော့နည်းစေချင်တာ ကိုယ့်ရဲ့ အဖြစ်ချင်ဆုံး ဆန္ဒ။ နောက်ပြီး သူတို့နှစ်ဦးက ကိုယ့်ရဲ့ အချစ်ဆုံးလူနှစ်ယောက်ဖြစ်နေခဲ့တယ်လေ။
ငယ်ငယ်က ကိုယ်က ဂရုစိုက်မှုတွေနဲ့ ချစ်ခြင်းမေတ္တာတွေကြားမှာ ကြီးပြင်းခဲ့တယ်။ ဒါပေမဲ့ စိုးရိမ်ကြောင့်ကျမှုတွေကလည်း ကပ်ပါနေသေးတယ်။ ကိုယ်ချစ်တဲ့သူနှစ်ယောက် မသင့်မြတ်မှာ၊ မုန်းတီးမှုတွေ ကြာရှည်မှာကို မလိုလားခဲ့ဘူး။ ကိုယ်တတ်စွမ်းသလောက် သူတို့နှစ်ယောက်ကြားက အေးစက်မှုတွေကို နွေးထွေးအောင် လုပ်ပေးချင်ခဲ့တယ်။
အချိန်တွေကြာလာတာနဲ့အမျှ သူတို့ကြားက အေးစက်မှုတွေက လျှော့ပါးလာခဲ့တယ်။ အဲဒီချိန်မှာ အပျော်ရွှင်ဆုံးက ကိုယ်နဲ့ အဖေပဲဖြစ်ပါလိမ့်မယ်။ 

ဆက်ရန်....



  Image and video hosting by TinyPic

No comments:

Post a Comment