မြန်မာနိုင်ငံကို ဒီမိုကရေစီနိုင်ငံအဖြစ် ထူထောင်ရမည်ဟူသော အယူအဆမှာ ၁၉၈၈ လူထုဒီမိုကရေစီအရေး တော်ပုံကြီးမှ စတင်၍ တစ်ကြော့ပြန် ပြန်လည်ပေါ်ပေါက်လာခဲ့သည်။ ထိုမှတဖန် တပ်မတော်သည် အာဏာ သိမ်းလိုက်ပြီးသည့်နောက် ပြည်သူလူထု၏ ဒီမိုကရေစီရေးကြွေးကြော်သံများသည် ပုံစံတမျိုးပြောင်းလဲကာ အာဏာသိမ်းတပ်မတော်အစိုးရ၏ ကြွေးကြော်သံဖြစ်လာခဲ့၏။ ထို့နောက် တပ်မတော်အစိုးရက ဒီမိုကရေစီ နိုင်ငံတော်သို့ဟူသော အလံကိုလွှင့်ထူပြီး လမ်းပြမြေပုံခုနှစ်ချက်ကို ရေးဆွဲအကောင်အထည်ဖော်၏။
ထိုမှတဖန် ရွေးကောက်ပွဲလုပ်ပြီး လွှတ်တော် ပေါ်ပေါက်လာ၏။
လွှတ်တော်မှ သမ္မတသစ် ရွေးချယ်ခန့်အပ်၏။
သမ္မတသစ်က အစိုးရသစ်ဖွဲ့၏။
အစိုးရသစ်တွင် ကာကွယ်ရေးဦးစီးချုပ်ထံမှ အမည်စာရင်းရယူသော ကာကွယ်ရေးဝန်ကြီး၊ ပြည်ထဲ ရေးဝန်ကြီး၊ နယ်စပ်ရေးရာဝန်ကြီးတို့လည်း ပါဝင်၏။
ထို့နောက် အစိုးရသစ်က ကောင်းသော အုပ်ချုပ်ရေးစနစ်နှင့် သန့်ရှင်းသော၊ လာဘ်ပေးလာဘ်ယူ ကင်းရှင်းသော အစိုးရဖြစ်အောင် လုပ်ကြမည်ဟု လမ်းစဉ်ချမှတ်သည်။ တိုးတက်သော၊ ခေတ်မီသော ဒီမိုက ရေစီနိုင်ငံ ထူထောင်မည်ဟု ဆက်လက်ကြွေးကြော်သည်။
သည်မှာ၊ ဒီမိုကရေစီက အားလုံး၏ ပန်းတိုင်လိုဖြစ်သည်။
ဒီမိုကရေစီနိုင်ငံ ထူထောင်ကြမည်လား။
ပြည်သူ့အဆုံးအဖြတ်များပေါ်မှာသာ လုံးလုံးလျားလျား အခြေပြုသည့် နိုင်ငံရေးအာဏာ၊ စီးပွားရေး အာဏာတို့ဖြစ်လာမှ ဒီမိုကရေစီနိုင်ငံဖြစ်မည်။ အုပ်ချုပ်ရေးမှာရော စီးပွားရေးမှာပါ ပြည်သူ့အဆုံးအဖြတ်တို့က နောက်ဆုံးမှာ အတည်ဖြစ်ရမည်။ ပြည်သူ့ကိုယ်စားလှယ်များက ပြည်သူ့အဆုံးအဖြတ်ကို နာခံသူများဖြစ်ရ မည်။ ပြည်သူ့ကိုယ်စားလှယ်များက ပြည်သူ့မျက်နှာကိုသာ ကြည့်သူများဖြစ်လာရမည်။ ပြည်သူ့ကိုယ်စား လှယ်များက ပြည်သူလူထုက လိုလားထောက်ခံသူများ ဖြစ်ရမည်။
အကောင်အထည်ဖော် တည်ဆောက်စရာတွေ ကြိုးပမ်းဆောင်ရွက်စရာတွေကို တိတိကျကျ လုပ်ငန်း စဉ်ရေးဆွဲပြီး ပြင်းပြင်းထန်ထန် လုပ်ကြရမည့်သဘော ရှိသည်။ ပြီးတော့ သည်လို လုပ်ကြရာမှာ အစိုးရသစ် က ချမှတ်သည့် လမ်းစဉ်နှင့် လုပ်ငန်းစဉ်များကို ပြည်သူလူထုက ယုံကြည်စွာဖြင့် ပူပေါင်းဆောင်ရွက်ဦးမှ ဖြစ် မှာဖြစ်သည်။
နိုင်ငံရေး၊ စီးပွားရေး၊ နိုင်ငံတကာ ဆက်ဆံရေး ကဏ္ဍအသီးသီးမှာ ထူထောင်ရမှာဖြစ်သည်။ သည်လို ထူထောင်သည့် ကဏ္ဍအသီးသီးနှင့် အစိတ်အပိုင်းတိုင်းမှာ ချွတ်ချော်တိမ်းစောင်းလို့မရ၊ နေရာတိုင်းမှာ ပြည် သူလူထု၏ ယုံကြည်မှုကို လိုအပ်သည်။ အစိုးရကို ပြည်သူလူထုက ယုံကြည်မှုရှိဖို့လို၏။ အစိုးရ၏လမ်းစဉ်ကို ပြည်သူလူထုက ယုံကြည်မှုရှိဖို့လို၏။ အစိုးရရေးဆွဲသော လုပ်ငန်းစဉ်များ၊ စီမံကိန်းများကို ပြည်သူလူထုက ယုံကြည်မှုရှိဖို့လို၏။
ပြည်သူလူထု၏ ယုံကြည်မှုကို တည်ဆောက်ရင်း ပြည်သူလူထု၏ ဒီမိုကရေစီအလေ့အကျင့်ကို အား ပေးရမည်။ ပြည်သူလူထု၏ လွတ်လပ်ပွင့်လင်းစွာ ပြောဆိုမှု၊ ဝေဖန်မှု၊ တာဝန်ယူတတ်မှုတို့ကို အားပေးရ မည်။
ပြည်သူလူထု၏ ယုံကြည်မှု၊ တက်ကြွစွာ ပါဝင်မှုတို့မရှိဘဲနှင့် ဒီမိုကရေစီ နိုင်ငံသစ်ကို မရောက်နိုင်ပါ။
ပြည်သူ့ခေတ် အယ်ဒီတာ (၁၃၊ မေ၊ ၂၀၁၁)
No comments:
Post a Comment