ဧရာဝတီမြစ်ဆုံမှာ ဆည်ဆောက်မယ့် ကိစ္စနဲ့ပတ်သက်ပြီး လူအများက စိုးရိမ်တကြီးနဲ့ စောင့်ကြည့်နေတဲ့ အချိန်မှာ ကျနော်လည်း ကျနော်နဲ့ နီးစပ်တဲ့၊ ခင်မင်ရင်းနှီးတဲ့ မိတ်ဆွေ သူငယ်ချင်း လူငယ်များရဲ့ သဘောထားအမြင်တွေကို မေးကြည့်မိပါတယ်။
လူအများကတော့ အဲဒီ မြစ်ဆုံဆည်ရဲ့ ဆိုးကျိုးတွေကို စာတွေဖတ်ပြီး သိမြင်တဲ့အမြင်ရယ် ပြီးတော့ ဧရာဝတီကို ချစ်တဲ့စိတ်၊ တန်ဖိုးထားတဲ့စိတ်နဲ့ "ဧရာဝတီဆိုတာ တစ်ဦးတစ်ယောက်တည်း ပိုင်တာမှ မဟုတ်တာ။ လုပ်ချင်တိုင်း လုပ်လို့ရမလား။ ဧရာဝတီက ပြည်သူတွေပိုင်တာပဲ။ ဒီဆည်ဆောက်တာကို တို့ကတော့ နည်းနည်းမှ သဘောမတူနိုင်ပါဘူး။ ဒီအစိုးရ ဆောက်ရဲရင် ဆောက်ကြည့်လိုက်ပါလား.." အဲသလို တက်တက်ကြွကြွ ရဲရဲရင့်ရင့်ဖြေသံကြားရရင်ဖြင့် ကျနော့်ရဲ့ နှလုံးခုန်သံတွေက ပူနွေးပြီး မြန်ဆန်လာတတ်ပါတယ်။ ပြီးတော့ ကျေနပ်အားရမိပါတယ်။ အဓိက က ဧရာဝတီဆိုတာ မြန်မာပြည်သား အားလုံးနဲ့ သက်ဆိုင်တယ်ဆိုတဲ့ အသိ ကလေးရှိဖို့နဲ့ ကိုယ့်ရဲ့ ဧရာဝတီကို ကာကွယ်ချင်တဲ့ စိတ်တွေရှိဖို့ပဲ လိုတာမဟုတ်ပါလား။
ဒါပေမဲ့ တချို့ကလည်း "ဆောက်ချင်ဆောက်၊ မဆောက်ချင်နေ၊ စိတ်ကိုမ၀င်စားတာ" လို့ ဖြေသူများလည်း ရှိသဗျ။ အဲဒီလိုဖြေသံကြားရရင်ဖြင့် ကျနော့်ရဲ့ ရင်ခုန်သံတွေ ခေတ္တရပ်တန့်သွားသလို အေးစက်စက်ခံစားချက်နဲ့ ၀မ်းနည်းမိပြန်ပါတယ်။ ဒီအရေးကိစ္စကြီးကို ကိုယ်နဲ့မဆိုင်သလိုများ နေစိမ့်လိုက်လေခြင်းလို့လည်း တဆက်တည်းတွေးလိုက်မိပါတယ်။
အဲ…တချို့ကျပြန်တော့လည်း "အခုမှ ဧရာဝတီကို လာချစ်ပြနေကြတယ်… အရင်ကတော့ မသိသလိုနေနေကြပြီး…" ဆိုပြီးလည်း စိတ်ပျက်စရာကောင်းအောင် ပြောတတ်ကြသေးတယ်။ တော်သေးတာက အဲလိုလူမျိုးက တစ်ယောက်တလေပဲ ရှိလို့ဗျို့။ နို့မို့ဆိုရင်တော့ ရင်လေးစရာပါပဲ။
ရင်လေးစရာဆိုလို့ တလောက လျှပ်စစ်ဝန်ကြီးပြောသွားတဲ့ စကားတွေကိုဖတ်အပြီးမှာတော့ စိတ်လည်း ပျက်မိသလို ကျနော်တို့တိုင်းပြည်မှာ အဲသလိုလူမျိုးတွေက နိုင်ငံခေါင်းဆောင်တွေဖြစ်နေပါလားလို့တွေးမိပြီး ရင်လေးရပါတယ်။ ပြီးတော့ မြန်မာပြည်မှာ သူလောက်တော်တဲ့သူ၊ တတ်တဲ့သူမရှိတော့ဘူးလို့ ကိုယ့်ကိုယ်ကို ပြောလိုက်တာဟာ လူရယ်စရာကြီး ဖြစ်လို့နေပါတယ်။ လူတစ်ယောက် ပညာမရှိဘူး ရှိတယ်ဆိုတာ သူ့ရဲ့ အပြောအဆိုကို အကဲခတ်လိုက်ရင်ပဲ သိမြင်နိုင်ပါတယ်။
ဒီနေရာမှာ ကျနော့်ကို အင်္ဂလိပ်စာသင်ပေးတဲ့ ဆရာပြောတဲ့ စကားလေးကို သွားသတိရလိုက်မိပါတယ်။ "I am perfect." တဲ့။ ငါပဲ တော်တယ်၊ ငါပဲ တတ်တယ်၊ ငါသာလျှင် အတော်ဆုံးဆိုတာ မရှိပါဘူးတဲ့။ ပြီးပြည့်စုံတဲ့သူဆိုတာ ကျနော်တို့ရဲ့ ဘုရားရှင်ပဲရှိပါတယ်တဲ့။ လောကမှာ အလုံးစုံပြီးပြည့်စုံတယ်၊ တော်တယ်လို့ ကိုယ့်ကိုယ်ကိုပြောတဲ့သူတွေမှာ ဘုရားကလွဲရင် ကျန်တာ သူရူးတွေပါပဲလို့ ဆရာက ပြောသွားပါတယ်။
ဒါကို တချို့တချို့လူတွေက ငါသာလျှင်အတော်ဆုံးဆိုပြီး အရူးလိုကြွေးကြော်တတ်ကြပါသေးတယ်။။ အဲသလိုပြောတဲ့သူက ဘုရားလောင်းလျာလား။ ဘုရားလောင်းလျာ မဟုတ်ရင်တော့ သူက အရူးပဲဖြစ်ပါလိမ့်မယ်။ အခု သူသာလျှင် အတော်ဆုံးလို့ ပြောသွားတဲ့ လျှပ်စစ်ဝန်ကြီးကတော့ ဘုရားလောင်းလျာ လုံးဝလုံးဝမဖြစ်နိုင်လေတော့ ဖြစ်နိုင်စရာတစ်ခုပဲရှိပါတယ်။ ဒါကတော့ ကျနော်ဆက်မပြောတော့ပါဘူး။ တွေးကြည့်ကြပါကုန်။
မြန်မာပြည်သားတွေပိုင်တဲ့ ဧရာဝတီမြစ်ကြီးကို ကိုယ့်သဘောနဲ့ကိုယ် ကိုယ့်အကျိုးစီးပွားအလို့ငှာ တိုင်းတပါးကို ရောင်းစားတဲ့ အနာဂတ်အရေး မျှော်မတွေးတဲ့ တိုင်းပြည်ခေါင်းဆောင်တွေကြောင့် ဧရာဝတီမြစ်ကြီး သေဆုံးရတော့မယ်။ ပစ္စုပ္ပန်ကိုသာ ကြည့်ပြီး အနာဂတ်အတွက် ပူပင်မှု မရှိတဲ့ ထိုထိုသူများကြောင့် ဧရာဝတီမြစ်ကြီး နစ်မွန်းတော့မယ်။ မြန်မာပြည်ကြီးကို တတိတိလှီးဖြတ်တာ အားမရသေးလို့… ဟော ခုတော့ ခုတ်ပိုင်းကြပြန်ပြီ။ တိုင်းပြည်က ထွက်သမျှ သဘာဝသယံဇာတများလည်း ကုန်သလောက်ရှိပြီ၊ နောက်ဆုံး နိုင်ငံကိုပါ ရောင်းဖို့စဉ်းစားလာကြပြန်တယ်။
သဘာဝသယံဇာတနဲ့ ပတ်သက်ပြီး ဆရာမောင်ဝံသကပြောထားတဲ့ စကားလေးကို ကျနော်အရမ်းပဲ နှစ်ခြိုက်မိပါတယ်။ ဆရာက ဘာပြောထားလဲဆိုရင် "တခြားနိုင်ငံတွေမှာ သူတို့တိုင်းပြည်က ထွက်တဲ့ သံယဇာတတွေကို မသုံးပါဘူးတဲ့။ တခြားတိုင်းပြည်တွေကနေ ၀ယ်ပြီး သုံးနေကြတယ်၊ တချိန်ချိန်အရေးတကြီး လိုအပ်ချိန်ကျမှ ထုတ်သုံးဖို့အတွက် ထားထားပါတယ်" တဲ့။ ပြီးတော့ ဆက်ပြီး ဆရာက "တကယ်တော့ သယံဇာတဆိုတာ အခုလက်ရှိပြည်သူပြည်သားတွေနဲ့တင်ဆိုင်တာ မဟုတ်ပါဘူးတဲ့၊ နောင်လာမဲ့ မျိုးဆက်တွေနဲ့ပါ သက်ဆိုင်ပါတယ်" လို့ ဆရာပြောထားတာကို ကျနော်ဖတ်လိုက်ရပါတယ်။
အဲဒီမှာ ကျနော်တွေးလိုက်မိတာက ကျနော်တို့ မြန်မာပြည်မှာလည်း သဘာဝသယံဇာတကို ဖြုန်းတီးမပစ်ဘဲ နောင်လာမယ့် မျိုးဆက်တွေနဲ့ဆိုင်တယ်လို့ စဉ်းစားပြီး ခြိုးခြံချွေတာပြီး တန်ဖိုးထားတတ်မယ့် ခေါင်းဆောင်မျိုးရှိရင် သိပ်ကောင်းမှာပဲလို့ တောင့်တလိုက်မိပါတယ်။ ခုတော့ ကျနော့်ရဲ့ ဆန္ဒတွေက မနီးစပ်နိုင်တဲ့အပြင် မျှော်လင့်လို့မရတဲ့ အဆိုးဆုံး အနေအထားကိုတောင် ရောက်သလိုဖြစ်နေပါပြီ။ နောင်လာမယ့် ကျနော်တို့တိုင်းပြည်ရဲ့ အနာဂတ်မျိုးဆက်တွေအတွက် တိုင်းပြည်ရဲ့ ဘယ်လို အမွေအနှစ်ကောင်းတွေကို ချန်ထားရစ်ခဲ့မလဲဆိုတာ စဉ်းစားမှ ကျနော်တို့ လူကြီးပီသမှာပေါ့။ ဒီမြစ်ဆုံဆည်ကြီးသာ အကောင်အထည်ပေါ်သွားကြည့်ပါလား။ နောင်လာမယ့် မျိုးဆက်တွေအတွက် ကျနော်တို့ ချန်ထားခဲ့တဲ့ အရာတွေက ကပ်ဘေးဆိုးတွေရယ်၊ လူမျိုလို့ လူမျိုးပျောက်မယ့် အရေးတွေရယ်ပဲ ဖြစ်သွားမှာပေါ့။
ကျနော်တို့ငယ်ငယ်က သင်ရိုးညွှန်းတန်းမှာ ဧရာဝတီမြစ်အကြောင်း သင်ရပါတယ်။ အဲဒီမှာ အသည်းစွဲနေတဲ့ အကြောင်းအရာတစ်ခုကတော့ ဧရာဝတီမြစ်ဆိုတာ မြန်မာပြည်ရဲ့ အသက်သွေးကြောဖြစ်တယ်ဆိုတဲ့ စကားကိုပါပဲ။ ဧရာဝတီ သေဆုံးသွားတာဟာ ကျနော်တို့ရဲ့ အသက်တွေ၊ သွေးတွေ သေဆုံးပျောက်ကွယ်သွားမှာနဲ့ အတူတူပါပဲ။
ပြီးတော့ အခုဆည်ဆောက်မယ်ဆိုတဲ့ မြစ်ဆုံဟာ ကချင်တိုင်းရင်းသားတွေရဲ့ အထွဋ်အမြတ်နေရာတစ်ခုပါပဲ။ ဒီနေရာမှာ “ကချင်ပြည်နယ် ပြည်သူ့လွှတ်တော် ကိုယ်စားလှယ်ဒေါ်ဒွဲဘူပြောသွားတာ ကျနော်သဘောကျပါတယ်။ ကချင်လူမျိုးနှစ်သောင်းကျော်ပြောင်းရွှေ့ရတယ်။ ပြည်ထောင်စုကြီးသာ ချမ်းသာခဲ့ရင်၊ ပြည်ထောင်စုကြီးတစ်ခုလုံးအကျိုးရှိရင် ကျမတို့ ကချင်လူမျိုးတွေ အနစ်နာခံရကျိုးနပ်ပါတယ်" လို့ပြောသွားပါတယ်။ အဲဒီလိုပြောသွားတဲ့ ကချင်အမျိုးသမီးကို ကျနော်လေးစားမိပါတယ်။
အများအကျိုးအတွက်သာကောင်းမယ်ဆိုရင်ဆိုတဲ့ သူ့ရဲ့ ရည်ရွယ်ချက်ကို လေးစားမိသလို၊ သူတို့လူမျိုး အနစ်နာခံရဲပါလို့ ရင်နာနာနဲ့ ပြောရမယ့် သူ့ရဲ့စကားအတွက်လည်း ၀မ်းနည်းမိပါတယ်။ တကယ်ပဲ ဒီစီမံကိန်းက အများအတွက် အကျိုးရှိမယ့် စီမံကိန်းဖြစ်မလား၊ မဖြစ်ဘူးလားဆိုတာ စဉ်းစားနေစရာကို မလိုပါဘူး။ ဒီစီမံကိန်းကြောင့် ဘယ်သူတွေက အကျိုးအမြတ်ဖြစ်မှာလဲ။ တရုတ်နဲ့ မြန်မာပြည်က လက်တစ်ဆုပ်စာ လူနည်းစုအပြင် တခြားဘယ်သူ့အတွက်မှ အကျိုးအမြတ်မရှိဘူးဆိုတာ စဉ်းစားစရာကို မလိုတဲ့ အကြောင်းအရာတစ်ရပ်ပါ။
ဒါကြောင့် ကျနော်တို့ရဲ့ဧရာဝတီ ဆက်လက်စီးဆင်းနိုင်ဖို့ အစွမ်းကုန် ကယ်တင်ကြရပါမယ်။ ဧရာဝတီကို ကယ်တင်ဖို့က နိုင်ငံသားတိုင်းရဲ့ သမိုင်းပေး တာဝန်တစ်ရပ်ပါပဲ။ မြန်မာပြည်နဲ့ ဧရာဝတီဟာ ခွဲခြားလို့မရတဲ့၊ ယှဉ်တွဲနေတဲ့ အရာတွေပါပဲ။ ဧရာဝတီပျက်စီးမယ့် အရေးဟာ မြန်မာပြည့်အရေးပါပဲ။ ကျနော်တို့ မွေးဖွားလာကတည်းက နိုင်ငံ့အကျိုးအတွက် ဘာတွေလုပ်ဆောင်ပြီးပြီလဲဆိုတဲ့ မေးခွန်းကို ကိုယ့်ကိုယ်ကို ပြန်မေးမိတဲ့အခါ ဖြေစရာအဖြေမရှိခဲ့။ ခုတော့ ဧရာဝတီကိုကာကွယ်ဖို့ ကျနော်တို့အရေး၊ ကျနော်တို့ရဲ့ တာဝန်ဖြစ်လာပါပြီ။ ဒီတော့ မိမိနိုင်ငံနဲ့ မိမိလူမျိုးကို ချစ်တဲ့သူတိုင်း မြန်မာနိုင်ငံသားတွေရဲ့ ဧရာဝတီကို စောင့်ရှောက်ကြပါစို့။
No comments:
Post a Comment