ယနေ့ခေတ်တွင် ကျနော်တို့လို လူငယ်တွေအတွက် အတတ်ပညာသင်တန်းမျိူစုံ ပေါများသော ခေတ်ကာလကြီးဖြစ်သည်။ ဂျာနယ်တွေ သတင်းစာတွေမှာပါတဲ့ ကြော်ငြာတွေကြည့်လိုက်ရင် သင်တန်းကြော်ငြာတွေက အများသား။ အင်္ဂလိပ်စာ သင်တန်းများ(IELTS၊ TOEFL)၊ တရုတ်ဘာသာစကားသင်တန်းနှင့် အခြား နိုင်ငံခြားဘာသာစကားသင်တန်းအသီးသီး၊ နည်းပညာပိုင်းဆိုင်ရာ သင်တန်းများ၊ LCCI စာရင်းကိုင်ဘာသာရပ် သင်တန်း၊ Computer သင်တန်းများ၊ စီမံခန့်ခွဲမှု (Management ) သင်တန်း ….စတဲ့ သင်တန်းတွေ အများအပြားပင်။ အဲဒီလို သင်တန်းတွေများတာ ကျနော်တို့ လူငယ်တွေအတွက်တော့ ယူတတ်မယ်ဆိုရင် ပညာရွှေအိုးပင်ဖြစ်သည်။
သင်တန်းတခုတက်ဖို့အတွက် ကုန်ကျသည့် ငွေကြေး၊ ပေးရမည့် အချိန်တွေနဲ့ တန်အောင် လေ့လာသည့်ပညာတခုကို ရအောင်ယူရမည်ဖြစ်သည်။ ယနေ့ခေတ် သင်တန်းကြေးတွေကလည်း နည်းလှသည်တော့ မဟုတ်။ ဘုန်းတော်ကြီးကျောင်းတွေမှာ ဖွင့်တဲ့ အခမဲ့ပညာဒါနသင်တန်းတွေလည်း ရှိသည်။ ဒီလိုပညာဒါနသင်တန်းတွေ ရှိသည့်အတွက် ငွေကြေးမပြည့်စုံလို့ ပညာမရှာနိုင်သူများအတွက် အထူးပင်ကောင်းမွန်လှသည်။ တချို့တွေကျပြန်တော့လည်း ငွေကြေးပြည့်စုံပါလျှက် ပညာလိုချင်သည့်စိတ်ကြောင့် မဟုတ်ဘဲ သင်တန်းတခုကို အပျော်သက်သက် တက်ကြသူများလည်း ရှိပါသည်။ ကိုယ်တက်သည့်သင်တန်းက လက်မှတ်တခုရချင်လို့၊ ကိုယ့်ရဲ့ သူငယ်ချင်းတွေက အဲဒီသင်တန်းကို တက်လို့၊ အပျင်းပြေသက်သက် သင်တန်းတက်သူများလည်း တွေ့ဖူးပါ၏။
တခါ ကျနော်မြို့ထဲဘက်ကိုအသွား လမ်းမှာ တက္ကသိုလ်တက်စဉ်က ခင်မင်ခဲ့တဲ့သူငယ်ချင်းတယောက်နှင့် ဆုံပါသည်။ ကျနော်တို့တွေ ကျောင်းပြီးကတည်းက မတွေ့ကြတော့တဲ့အကြောင်း၊ အခုဘာလုပ်နေလဲ၊ ဘယ်သူငယ်ချင်းနဲ့ဖြင့် ပြန်ဆုံသေးလား စသည်ဖြင့် စကားတွေ အလုအယက်ပြောဖြစ်ကြသည်။ သူက အခုလောလောဆယ် အိမ်မှာနေရင်း သင်တန်းတခုတက်နေတဲ့အကြောင်းပြောသည်။ ဒါနဲ့ ကျနော်လည်း အဲဒီသင်တန်းကို ဘာအတွက်ကြောင့်တက်ဖြစ်တာလဲ၊ ၀ါသနာပါလို့လား စသည်ဖြင့် မေးမြန်းမိသည်။ သူပြန်ဖြေတဲ့ အဖြေကြောင့် ကျနော်အံ့သြသင့်မိသည်။ သူ့အဖြေက ‘ဒီလိုပဲ အိမ်မှာနေရတာ ပျင်းလို့ တက်လိုက်တာပါဟာ။ ၀ါသနာပါလို့လည်း မဟုတ်ပါဘူး’ တဲ့။ ကျနော်ကတော့ မနည်းလှသော သင်တန်းကြေးနဲ့ အချိန်တွေကို နှမြောလိုက်တာဟု သူ့ကို ပြောမိလိုက်သည်။
ဟုတ်ပါသည်။ သူ့လို သင်တန်းတခုကို ပျင်းလို့ တက်တဲ့သူ၊ မိဘက တက်ခိုင်းလို့ တက်ရတဲ့သူ၊ သူငယ်ချင်းက အဖော်လာဆွယ်လို့ တက်ဖြစ်တဲ့သူ၊ လက်မှတ်လေးတခုရရင် အလုပ်လုပ်ဖို့လွယ်တယ်ဆိုတဲ့ အတွေးနဲ့ သင်တန်းတက်သူတွေ ….စတဲ့ ပညာလိုချင်တာ အဓိကမဟုတ်ဘဲ အပျော်သက်သက် တက်တဲ့သူတွေက အများသားရယ်ပါ။ သင်တန်းလည်းပြီးရော ပေးလိုက်ရတဲ့ ငွေကြေးနဲ့ အချိန်အတွက် စာရွက်လေးတခုသာ ရလိုက်တာမျိုး။ တပြိုင်နက်တည်း သင်တန်းပေါင်းစုံတက်ကာ ဘယ်ပညာကိုကိုမှမယ်မယ်ရရ မတတ်ကျွမ်းဘဲ လက်မှတ်တွေတပုံတပင်ရှိသူတွေလည်း မနည်း။
တကယ်တော့ ကျနော်တို့အရွယ်ရောက်ပြီးသား လူငယ်တွေမှာ သူတပါးစေစားမှုကြောင့် မဟုတ်ဘဲ ကိုယ်ပိုင်အတွေးအမြင်၊ ကိုယ်ပိုင် အသိဉာဏ်နဲ့ တွေးတောဆင်ခြင်သင့်တဲ့ အရွယ်တွေပါပဲ။ ကျနော်တို့ရဲ့ ပညာသင်ချိန်အတော်များများကိုလည်း စာရွက်တရွက် (ဘွဲ့လက်မှတ်တခု)နဲ့ လဲလှယ်ခဲ့ပြီးပြီ။ အခုဆက်ပြီးလည်း ထိုနည်း၎င်းအတိုင်းပင် ဆက်သွားမယ်ဆိုရင် ကျနော်တို့ရဲ့ အနာဂတ်တခုလုံးဟာ အချင်းမရှိတဲ့ စာရွက်တွေနဲ့သာ အဆုံးသတ်ရမှာပါ။
ဒါကြောင့် အချိန်ပေါလို့ပဲဖြစ်ဖြစ်၊ ငွေပေါလို့ပဲဖြစ်ဖြစ် သင်တန်းတွေတက်နေတာမျိုး မဖြစ်စေဘဲ တကယ်ပညာလိုချင်လို့ ကိုယ့်ရဲ့ဝါသနာ၊ ကိုယ့်ရဲ့ဉာဏ်ပညာနဲ့ ကိုက်ညီမယ့် သင်တန်းမျိုးကို ရွေးချယ်တက်ရောက်နိုင်စေဖို့ရာ ကျနော်မျှော်လင့်မိပါတယ်။
No comments:
Post a Comment